Para poder facer unha avaliación da importancia e consecuencias da actividade humana, é preciso primeiro coñece-lo funcionamento da zona. Neste traballo abórdase o estudo do comportamento morfodinámico do complexo praieiro de Rodas, o que axudará a determina-la tendencia evolutiva e grao de estabilidade que presenta na actualidade. O estudo da evolución do sistema sedimentario estase facendo mediante: * Perfís topográficos, con frecuencia bimensual * Topografía da lagoa, en verán e inverno. * Batimetría da zona sumerxida da praia. * Análise sedimentolóxica e composicional de mostras recollidas na praia, lagoa e zona sumerxida. * Batimetría da zona sumerxida da praia. * Medición empírica da dirección de transporte mediante trazadores.

Durante o ano 2000 comezamo-lo estudo dos Cnidarios bentónicos das Illas Cíes, dentro do proxecto de investigación arriba mencionado, subvencionado pola Universidade de Vigo na súa convocatoria de Axudas á Investigación correspondente ao ano 1999. Con este estudio preténdese contribuír a un mellor coñecemento da fauna de Cnidarios das Illas Cíes, dado que os únicos datos existentes ata o momento se limitan á sinalización dalgunhas especies de Hidrozoos e Antozoos incluídas en traballos xerais sobre comunidades bentónicas das illas ou sobre Cnidarios de todo o litoral galego. Ó longo do presente ano realizamos 12 mostraxes repartidas ó longo de todo o perímetro das illas, dos cales 8 corresponden a estacións intermareais e 4 a estacións infralitorais.